Vélsmiðjan stækkar - Samstarf við Frumherja

 Í nýrri viðbyggingu sem nú rís mun skoðunarfyrirtækið Frumherji hf. vera með aðsetur auk þess sem Vélsmiðjan nýtir þessa nýju aðstöðu m.a. til prófunar á hemlunarbúnaði.

Að sögn Ómars Davíðs Ólafsson verkstjóra hjá Vélsmiðju Grindavíkur er stefnt að því að nýja álman verði tilbúin í lok janúar. Frumherji verður með opið einn til tvo daga í viku og jafnframt verður aukin þjónusta í kringum mánaðarmót. Hægt verður að panta tíma og viðskiptavinir geta skilið bílana eftir á morgnana og náð í þá síðar um daginn.  Opnun Frumherja hf. í Grindavík er liður í stefnu fyrirtækisins að auka þjónustuna víðar á landsbyggðinni.

Að undanförnu hefur jafnframt verið unnið að breytingum í móttöku Vélsmiðjunnar í þeim tilgangi að opna þar verslun og auka þannig þjónustuna. Vélsmiða Grindavíkur sinnir alhliða bílaviðgerðum og býður einnig upp á bilanagreiningar með tölvu. Þá eru strákarnir í smiðjunni þekktir fyrir hversu þjónustuliprir og þægilegir þeir eru.